Alceé Fortier.
XVII. “Des Os Qui Chanté.”
Yavait eine fois ein n’homme et ein fame qui té gagnin vingt-cinq pitis. Yé té très pove, n’homme la té bon, fame la té mauvais. Tous les jous quand mari la té révini so louvrage fame la té servi li dinin, mais toujou la viande sans des os.
— Comment ça fait la viande la pas gagnin des os?
— Pasqué des os ça pesé, et c’est meilleur marché sans des os. Yé donnin plis pou largent.
Mari la mangé et pas dit arien.
— Comment ça fait to pas mangé la viande?
— To blié me pas gagnin dents. Comment to lé mo mangé la viande sans dents?
— C’est vrai, dit mari la, et li paix pasqué li té pair fait la peine so fame qui té aussi laide que li té méchant.
Quand moune gagnin vingt-cinq pitis moune pas capabe pensé yé tout temps et moune pas oua si yé na ein ou dé qui manqué. Ein jou après so dinin, mari la mandé so pitis. Quand yé té coté li li compté yé et jiste trouvé quinze. Li mandé so fame ou té disse les otes yé. Li réponde yé té chez yé grandmoman et tous les jous li voyé ein lote pou yé changé l’air. ça té vrai, tous les jous yavait eine qui manqué.
Ein jou mari la té on so pasporte divant ein gros la pierre yé té gagnin la. Li tapé pensé so pitis et li té oulé couri chercher yé chez yé grandmoman, quand li tende des lavoix qui tapé dit :
Nous popa manzé nous.
Nous pas dans la bière,
Nous pas dans cimetière.
En premier li té pas rende compte ça ça té, mais li levé la. pierre la et li oua ein grand quantité des os qui recommencé chanté. Li comprende alors c’était des os so pitis so fame té tchué et que li té manzé. Alors li té si en colère li tchué so fame et terré des: os so pitis dans cimetière et li couri. resté sel chez li. Dipi temps la li jamais manzé la viande pasqué li té toujou cré. c’était so pitis, li té apé manzé.
Text prepared by:
- Garret Brown
- Allison Hurst
- Colin McRae
Source
Fortier, Alcée, trans. “XVII. Des Os Qui Chanté.” Louisiana Folk-Tales in French Dialect and English Translation. Ed. Alcee Fortier. Boston: American Folk-Lore Society, 1895. 60. Internet Archive. 2005. Web. 16 October 2014. <http://books. google.com/ books?id= bzhLAAAAIAAJ>.